புலமைப் பரிசில் பரீட்சை பெறுபேறுகள் வெளியீடு

 2024ஆம் ஆண்டுக்கான தரம் ஐந்து புலமைப் பரிசில் பரீட்சை பெறுபேறுகள் இன்று (23) மாலை இணையத்தில் வெளியாகின. 

பரீட்சைகள் திணைக்களம் இதனை அறிவித்துள்ளது.  

பெறுபேறுகளை பார்வையிட...
இதன்படி, இலங்கைப் பரீட்சைத் திணைக்களத்தின் உத்தியோகபூர்வ வலைத்தளமான www.doenets.lk  இணையத்தளத்தில் பெறுபேறுகளைப் பார்வையிட முடியும். 

இதேவேளை, 2024ஆம் ஆண்டுக்கான தரம் ஐந்து புலமைப் பரிசில் பரீட்சை கடந்த செப்டம்பர் மாதம் 15ஆம் திகதி நடைபெற்றது.

இதில் 244,092 மாணவர்கள் சிங்கள மொழி மூலமும், 79,787 மாணவர்கள் தமிழ் மொழி மூலமும் என மொத்தம் 323,879 மாணவர்கள் தோற்றியிருந்தனர். 

மேலும், இந்த பரீட்சை வினாத்தாளில் 3 வினாக்கள் வெளியில் கசிந்தமை தொடர்பில் பல்வேறு சர்ச்சை நிலைகள் ஏற்பட்டிருந்ததுடன், நீதிமன்றத்திலும் வழக்குத் தாக்கல் செய்யப்பட்டிருந்தது.

இதனையடுத்து,  பரீட்சை  வினாத்தாள் மதிப்பீடு நடவடிக்கைகளிலும் இது பாரிய தாக்கத்தை செலுத்தியிருந்த நிலையில்,  பல்வேறு சர்ச்சை மற்றும் குழப்பங்களுக்கு மத்தியில் பரீட்சை மதிப்பீடுகள் நடத்தப்பட்டு பெறுபேறுகள் இன்று வெளியிடப்பட்டுள்ளமை குறிப்பிடத்தக்கது. 

இந்தநிலையில், இன்று (23) நாடாளுமன்றத்தில் கேட்கப்பட்ட கேள்விக்கு பதிலளித்த பிரதமர், புலமைப்பரிசில் பரீட்சையுடன் ஏற்பட்ட நெருக்கடி காரணமாக, பெறுபேறுகளின் மதிப்பீட்டை இடைநிறுத்த நீதிமன்றம் உத்தரவிட்டதால், பெறுபேறுகளை வெளியிடுவதில் தாமதம் ஏற்பட்டதாக குறிப்பிட்டார்.

“இது இவ்வளவு நேரம் எடுத்தது எங்களுக்கு மிகவும் துரதிர்ஷ்டவசமானது. 

ஆனால் அதற்குக் காரணம், ஐந்தாம் வகுப்புத் தேர்வில் ஏற்பட்ட நெருக்கடியுடன் எழுந்த நீதிமன்ற உத்தரவின் காரணமாக வினாத்தாள் மதிப்பீட்டை நிறுத்தி வைக்க வேண்டியிருந்தது என்று தெரிவித்தார்.